ໃນຕອນເຊົ້າ ຂອງວັນທີ 15 ມີຖຸນາ 2022 ເວລາ 8:00 ນາທີ ຢູ່ທີ່ຫ້ອງປະຊຸມ ພະແນກ ເຕັກໂນໂລຊີ ແລະ ການສື່ສານ ແຂວງ ຫຼວງນໍ້າທາ ໄດ້ເປີດກອງປະຊຸມປັບປຸງກົງຈັກການຈັດຕັ້ງຂອງພະແນກ ເຕັກໂນໂລຊີ ແລະ ການສື່ສານ ແຂວງຫຼວງນ້ຳທາ ພາຍໃຕ້ການເປັນປະທານຮ່ວມຂອງ ທ່ານ ພູນແກ້ວ ເຫຼົາອີນ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງ ແລະ ທ່ານ ຈັນທະວີພອນ ເຄືອບຄຳວອນ ຮອງຫົວໜ້າກົມຈັດຕັ້ງ - ພະນັກງານ ກະຊວງ ເຕັກໂນໂລຊີ ແລະ ການສື່ສານ. ມີບັນດາທ່ານຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານວິຊາການພາຍໃນພະແນກ ແລະ ທີ່ມງານທີ່ມາຈາກກົມຈັດຕັ້ງ-ພະນັກງານ ກະຊວງ ເຕັກໂນໂລຊີ ແລະ ການສື່ສານ ເຂົ້າຮ່ວມຈໍານວນທັງໝົດ 26 ທ່ານ, ຍີງ 12 ທ່ານ. ກອງປະຊຸມດັ່ງກ່າວໄດ້ຮັບຟັງການລາຍງານສະພາບວຽກງານກົງຈັກການຈັດຕັ້ງ ຂອງພະແນກ ເຕັກໂນໂລຊີ ແລະ ການສື່ສານ ແຂວງນ້ຳທາ ແລະ ສະພາບການຈັດຕັ້ງປະຕິບັດວຽກງານຫັນເປັນທັນສະໄໝທາງດ້ານດີຈີຕອນຢູ່ພາຍໃນແຂວງ. ຫລັງຈາກນັ້ນກໍ່ໄດ້ມີການສົນທະນາແລກປ່ຽນຄວາມຄິດເຫັນຕໍ່ກັບການປັບປຸງກົງຈັກການຈັດຕັ້ງຂອງພະແນກຢ່າງກົງໄປກົງມາ ແລະ ເຕັມໄປດ້ວຍມີບັນຍາກາດທີ່ດີ. ກອງປະຊຸມໄດ້ດຳເນີນໄປເປັນເວລາ 1 ວັນ ແລະ ໄດ້ປິດລົງ ໃນເວລາ 16 : 00 ນາທີ ຂອງວັນດຽວກັນ.